Pages

Saturday, May 14, 2011

SEMPAMA JAKU IBAN

1. BESELING KAIN = nadai penemu ba sesetengah pekara

2. BINGKUK BATANG EMPASA, LURUS ULU LUNGGA = enda tentu lurus ati tang enda ga
kelalu jai

3. BETEBU DI MULUT, BELEMETAK DI ATI = manah jaku tang enti udah ulih lalu berubah ati

4. BERUMAHKA ATI ORANG = nyerangkung ati orang ari belakang

5. BAKA TEKURA ENGGAI ENDA MANTUPKA DIRI BA BANDIR = enda mantur ngapa

6. BATANG ENDA TELANGGARKA TUGA = anak enda telabanka apai indai / nembiak enda
telabanka pengajar.

7. BELAKANG BUNGKUK DIASUH NGEMA PINTU, LENGAN SINGKUNG DIASUH NYAN
ALU = orang ke nadai penemu diasuh ngereja utai tauka dipadu bejaku.

8. BEPELING PITAK = kena manding utai ke bepeling baka pitak

9. BAKA BAYA DITEGAH INDU = nadai temu tunga ati laban kelalu kesal

10. BETUNGGANG LUPUNG = ngerepas sebarang naka pemisi utai

11. BAKA TUNGKU DEH TAU BESENGKI = bisi maya enda tau enda belaya enggau pangan diri
sepemanjai umur begulai.

12. BAKA MANANG NANGKAP SEMENGAT = beguai/ berumban

13. BAKA NGELAKUKA TAJAU BELAH = mar bebini / belaki

14. BAKA KE NANYA LAUT BIRA = enggai nyaut maya ditanya

15. BAKA SANGKUH ADUH, DIASUR PEDIS, DIBATAK PAN PEDIS = enda ulih diseliah /
nadai jalai nulung

16. BAKA TELU DI TAPA, ENTI DIPICHIT TENTU PECHAH = ba baruh kuasa orang

17. ENDA NEMU LANGIT RUNTUH = enda nemu maya penusah nyadi

18. ENDA KALA MINDAH ARI TELUK DAPUR = enda kala nemuai ngagai menua bukai

19. MATI PADI, MATI RUMPUT = duit nadai, pemakai pan nadai / pemadu penyuntuk

20. MANTAP BEMBAN AI, NGEMALU MUA DIRI = jaku kena nanya bini

21. MERANGAU BAKA MULUNG = tuai alu enda belaki

22. MUGU HARI = ari pagi datai ke malam

23. MAKAI EMPEDU BANGAH = gawa baka orang bukai

24. MAIN ULAR = enda lurus ati

25. MIT LEKA SEMAKAU = taja gamal mit tang kering sereta regas

26. MAPAKA RAU = ngasakka diri makai utai laban kelalu lapar

27. MAYUH SUNGAI ALAI MANSAI, MAYUH LUBUK ALAI NYAUK = mayuh orang dikedaka
ati

28. MAKIN PELUH MAKIN BEKAYUH, MAKIN LELAK MAKIN
BERUMPAK = enda mudah nyerah alah / bebendar ngereja pengawa

29. NIBARKA JALA ENDA BETATING, NIBARKA UBUNG ENDA BESAYAP
= ngaga pengawa sepeneka ati enggau enda nitihka utai ke patut

30. PIPIT DI TISI LANGIT DEKA DITUNU, RUSA DI KAKI TANGGA ENDA DIEMPARU
= ngemeratka orang bukai ari diri sebilik.

Naka mih penyanyau kitai Iban enti enda ngelala pemanah jaku bansa diri empu. Nama kebuah kitai semina nemu jaku bansa bukai tang kitai kelalu mimit penemu dalam jaku Iban. Penanggul ti baka tu enda tau ditejuka pia aja laban iya tau disempamaka "baka ipuh ti tau munuh nyumbuh sekayu kampung'. Enti kitai empu enda belajar ke jaku bansa diri empu, sapa agi dikandal ke kitai?? Nya alai, tempap dada, tanya peneka ati diri empu. Anang mih mudah manjung ba pala wong laban semina ngasaika diri nemu nyebut leka jaku Iban? Bisi kita kala macha Kamus Padat Dwibahasa Iban-Melayu Edisi 1 ke ditengkebang serakup Sarawak Iban Writer's Association (SIWA)?? Nemu kita sistem Jaku Iban Standard ke dikena ba peringkat SPM? Nemu kita reti jaku kaling sebut, jaku turu tauka pengenap tesa??
Enti ENDA NEMU, tambahka penemu diri empu lalu kerembaika pemanah jaku bansa kitai ngagai bansa bukai. Ukai aku ka madahka diri pandai jaku Iban tang laban aku ngasaika aku mimit penemu, nya mih aku terus belajar ke jaku ku empu sereta ngujika penalam penemu enggau ngambi jaku Bahasa Iban peringkat SPM (2009). Berkat Tuhan, aku bulih A1 jaku Iban dalam SPM tang aku ngasaika aku agi muda dalam penemu jaku Iban. Semina nemu sekerat ari pengaya jaku aku empu. Aku deka terus belajar jaku ku empu, ukai nya semina puas ati laban udah belajar dalam peringat SPM. Nya alai, aku enggau beserakup dalam gempuru Kelab Bahasa Iban ba IPG Tun Abdul Razak (2011). Keba ku orang tuai "jauh agi pejalai, mayuh agi diasai, lalu luas agi ga kerembai penemu". Pesan aku, belajar mih ke pemanah enggau pengaya jaku kitai Iban seagi kitai bisi peluang.

6 comments:

  1. cukup manah jaku sempama nuan ibu'...

    ReplyDelete
  2. hehe..pengaya jaku bansa kitai :)

    ReplyDelete
  3. manah amat blog tok....thumb up!!!

    ReplyDelete
  4. terima kasih pengajar laban nuan udah bekunsi ka penemu ti chukup manah...^___^

    ReplyDelete
  5. Endang patut jaku iban tu di pelajar ka nembiak rebak baru..enggai ka kitai enda nemu jaku bansa diri..di ambi ka chunto:jaku iban mayuh dicampur enggau jaku bukai:nadai sik,nyebut nadai..nyau enda manah di dinga

    ReplyDelete